إلى نواب البرلمان … مالا شنوة قاعدين تعملو كيف هذا الكل ما يعنيكمش … مالا علاش انتخبناكم

ليس لنا عداء مع حتى نايب من نواب المجلس في تونس … الشعب الكريم ختارهم وعطاهم الزهر واللوم بعد القضاء بدعة.

وفمة في النواب شكون حاجز مقعد دائم في البرلمان يسلم قرايتو والناس الي خدمتلو الحملة. ومع هذاكا من باب المستحيل تشوفو واو تسمع حسو.

اضرابات واعتصامات “خاطيه موش اختصاصو … تنمية ومشاريع وجهات وومشاكل عالقة ” موش اختصاصو

عنف وتعذيب وايقافات ” موش معني” .. ناس عطاشة وناس “خصووها” وناس تموت كل يوم بالكورونا ” موش اختصاصو.

وينو النايب … في مطعم البرلمان يفطر … يتغدى … يتعشى … كراء بلاش ماء وضوء بلاش … شايخ مبحبح.

وينو الشعب الي انتخبهم… هاو يعاني

ماو فمة نايب في البرلمان الدورة السابقة… كان صديقي … عملنا قهوة قبل ما تصير انتخابات 2014. كان عسل دنيا … هكة هكة بالناس تقول ملاك وجهو منور والتبسيمة مالشدق للشدق. قاعد معايا وباش يموت من الحشمة وحلف كان القهو يخلصها هو وماخلصهاش.

كلمتو في 2017 … لزيارة معتصمين من جماعة الكباب بعد مارفضت الوزارة انهم يخدمو رغم نجاحهم… علق عليا ماهزش

كلمتو مرة ثانية في 2018، بالزهر طلع عندو ما يعمل دوب سلم عليا وعلق قالي توا نرجعلك لهاذي ساعة.

تلزيت كلمتو مرة على طفل من الجنوب التونسي مريض بالمرض الخايب … قلتلو شوفو معانا وزارة الصحة خلي تسهللوا الاجراءات … محبش قالي موش لاهي.

مرة جاء الوجه في الوجه في بهو البرلمان … سلم عليا باشارة بايدو وذاب …

في 2019 وقبل الانتخابات الفارطة كلمني … بعثلي مساج على الفيسبوك وعاود كلمني مرتين على تليفون … قالي ايجا نعملو قهوة … قلتلو مشغول صاحبي وعلقت عليه من يومها لهذي ساعة ما تقابلناش.

الحمد لله ما ربحش في النتخابات واليوم فص ملح وذاب …

يحكيلي صاحبي قالي هوكة صارلو كيف جماعة الشعبة متاع بن علي بعد الثورة كيف خرجوا لابسين سفساري باش الناس ما تعرفهمش.. هو زادة قالي وجهو معادش باين .

علاش حكيت لحكاية هذي … اغلب الي يترشحو للبرلمان في ايامات الانتخابات تلقاه يجري بين الناس وهات من طيبية وهات من تواضع لين تقول هذا هو الي يخدم لبلاد. بمجرد يدخل للبرلمان ينسى حومتو وأولاد حومتو. ينسى ولايتو ويمكن حتى امو وباباه ينساهم.

مناطق محرومة من “جغمة الماء”ذ

أصحاب الشهائد في اضراب جوع

ناس الي تضرت من الحجر الصحي دنيتها واقفة … ناس جاعت وفدت ومالقات بيها وين

مئات الإيقافات لشباب شدوه يحتج في الليل او في النهار … شباب رموه في لحبوسات ونساووه

شطر شباب تونس في الحبوسات على “سجارة زطلة” … رجال خززت في الجيور على النفقة …

عشرات موقوفين على ستاتي فيسبوك أو على فكرة عبر عليها.

قوانين بالية … كل شي حابس … تصورو حتى دواء الكورونا فلسطين … شعب فلسطين الي محتل من قبل الصهاينة بداو يلقحو من الشهر الي فات … نحنا عايشين بالقدرة… مازلنا نستنو في تالف الراي يخلي وزير الصحة يحلف على القرآن …

وينهم النواب وعلاش أصلا تم انتخابهم …

تبعثلو مساج تقلو فولان توقف على خاطركم … يعلم روحو موش هوني …

تبعثلو تقلو شوف فولان شنوة عملولو في منطقة الحرس بالمنستير …

تقلو معلم انت ماو نايب على القصرين … هاي منطقة كاملة عطشانة … يعملك جام قلوب … يرحم بوك معلم ترجعلك في الفرح.

“لقد أسمعت لو ناديت حيـًا.. ولكن لا حياة لمـن تنادي

حتى رئيس الجمهورية الي قلنا توا يكون حاجة فريدة … حاجة ما صارتش … هاو طلع من كوكب اخر ولاهي في زقفونة وحساب وتهديد وووو” حالتوا مستعصية أصل.

أيها الشعب الكريم “عليك بصبري ” هي في الاصل عليكم بالصبر … أما ناس بكري قالو “صبري” اكثر تعبير تعني “مضمض” أما هوما زادوها الياء المكسورة مثل قلوبنا واحلامنا المكسورة.