والي الدكتاتورية … ووالي الثورة … والحقرة للرجالة والحراير

الشباب والكهول امام مقر ولاية قفصة صباحكم صبر أيوب … لعل الله يحدث بعد ذلك أمرا

تخيلوا لو أن ثورة لم تقم في البلاد … نعرف كان نظام التجمع يمنع حق التظاهر … فقط تخيلو لو كنتم الأن على أبواب ولاية قفصة والزمن زمن الدكتاتورية … زمن نظام التجمع المجرم. وبشكل ما تمكنتم من افتكاك حقكم في الاعتصام امام الولاية ونصبتم قواطينكم.

وجاءت وسائل الاعلام وانتشر خبر اعتصامكم … تخيلو كم ساعة سيدوم اعتصامكم … كيف سيتصرف الوالي وقتها ولجان التنسيق ماذا عساها فاعلة ورئيس الشعبة والمعتمد والحرس والعسس والقوادة.

يعيطو للوالي ربع ساعة في لجنة التنسيق … هاي كيفاش تصير القسمة وكيفاش يكون الحل

هاضوكم ولادنا يدخلو يخدمو توا توا ..

وهاذوكا مشوشين … الحرس يوقفهم ويمشو يبحثو

وهاضوكم ما عدوش الجيش نبعثوه للصحراء

بعد ساعة عشرات الشباب يدخلو يخدمو والباقي للفينقة…

خلينا نرجعو لزمن الثورة … لليوم ولبارح… شباب مطيش على البلاط قدام الولاية … شباب متخرج وبطال مئيس مدمر … خرج يحتج بشكل سلمي … قاللهم يا نخدم يا نموت قدام الولاية. لا نحنا اولادهم وخدمونا … ولا نحن مشوشين ووقفونا ولا عمرنا وبدوناتنا متاع جيش باش يبعثونا لمغيلة والا الرماددة … نحن اصحاب الشهائد متاع خدمة ومتاع كرامة

ملول شوي ضغط لحل الاعتصام وتخويف وبعد كيف يعرفو الشباب شاد الصحيح … يجي الحل الصحيح … خلي يعتصم ينعم بحقو في الاعتصام … يكل البرد عظامو … توا يفد ويروح …

معلم مافماش اجتماع في لجنة التنسيق … ياخي معادش فمة عمدة او معتمد او شؤون اجتماعية تنظر في الملفات .. مافماش اجتماعات جملة … عجب

صاحبي رانا في زمن الثورة … مافماش لجان تنسيق ولجان يقضة وحتى العمد والمعتمدين لتوا موجودين اما بالغياب … عادي جدا تلقى عمدة يشرب في كاس تاي ويلوج في مواطن صالح يخلص عليه… عادي جدا تلقى معتمد نهار كامل هامل تسهلو على اعتصام يقلك راهم مقرفين في المعتمدية وانا نخدم من الدار.

في اعتصام قفصة المعتصمين لتوا لا حكى معاهم حد …

“زنوس جايين من الاحياء الفقيرة والارياف يطالبو بالخدم مافيبلهمش انها شركة الفسفاط مسكينة باش تفلس … هوكة هوما يتمتعو بحقهم في الاعتصام واحنا نتمتعو بحقنا في التجاهل … ”

لسان حال المسؤولين كيف يشوفوا المعتصمين قدام الولاية.

مساج لوالي قفصة: راهو انت أو اي والي في بلاصتك يخمم يحارب المافيات الي تعطل في الانتاج والحيتان الكبيرة الي توكل في قوت الشعب، ستشن ضده حرب قذرة لعزله من الولاية حتى يتسنى لهم مواصلة مص دم شركة فسفاط قفصة.

لا تفتح عليك كل الجبهات … ثمة كعبات معتصمين قدام الولاية افتح الدوسيات وشوف حلول حقيقية الرجال والنساء تعبت وصار فيها وهي تستنى في رحمتك … راهو من محاسن الثورة انها الناس تطالب بحقها بشكل سلمي وتضغط باش تفك حقها الي بقات عشرات السنين ما فكتوش كيف شدت ديارها. موش جريمة انوا واحد يعتصم او يقول للدولة انو فعلا وضعية اجتماعية وأحق من غيرو في الانتداب الاستثنائي.

انا سمعت حوارك كامل … ونتفهم ثقل مهمة مكافحة تعطيل انتاج الفسفاط

لكن قرارك الحازم في خصوص المعتصمين وعدم التحاور معاهم او فتح ملفاتهم للرأي العام … بالك هوما غشونا وموش وضعيات اجتماعية وما يستحقوش الانتداب … زعمة مافيهم حتى واحد يتمتع بالانتداب الاستثنائي

شوفنا ثماش شكون من المعتصمين وضعية تاعبة علخر ويستحق فعلا تشغيل … جيست خلينا نهبطو نقولو والي قفصة اجتمع بمعتصم او نجح في تشغيل واحد من أصحاب الشهائد المعطلين عن العمل … موش يقولو اول الغيث قطرة ..

نواب قفصة … لا حياة لمن تنادي

المشيشي .. مخاطبكم مشغول في الوقت الحالي

كل المقالات التي نكتبها في المواضيع والقضايا الحقوقية ومنها قضية التشغيل نرسلها الى مؤسسات الدولة (رئاسة الحكومة رئاسة البرلمان وللمؤسسات المعنية ولكل المؤسسات الاعلامية ولزملاء الصحفيين)

رئاسة الجمهورية منبعثولهاش … معلم شكون يعرف تدوخ عكاشة وترصيلنا نبحثو على جرد مايل … وزيد الرئيس هاو صعبها علينا .. يلزم مقال مكتوب بالبلومة ورئيس تشريفات يسلم ويستلم …